Col 1 | KhmKCB | STEP | ខ្ញុំ ប៉ូល ជា សាវក របស់ព្រះ យេស៊ូ គ្រិស្ដ តាម បំណង របស់ ព្រះជាម្ចាស់ និង ធីម៉ូថេ ជា បងប្អូន

Colossians 1

1 ខ្ញុំប៉ូលជាសាវករបស់ព្រះយេស៊ូគ្រិស្ដតាមបំណងរបស់ព្រះជាម្ចាស់និងធីម៉ូថេជាបងប្អូន 2 ជូនចំពោះពួកបរិសុទ្ធនិងពួកបងប្អូនស្មោះត្រង់ទាំងឡាយនៅក្នុងព្រះគ្រិស្ដដែលនៅក្រុងកូល៉ុសសូមឲ្យព្រះជាម្ចាស់ជាព្រះវរបិតារបស់យើងប្រទានព្រះគុណនិងសេចក្ដីសុខសាន្ដដល់អ្នករាល់គ្នា។ 3 ពេលយើងអធិស្ឋានសម្រាប់អ្នករាល់គ្នាយើងតែងតែអរព្រះគុណព្រះជាម្ចាស់ជាព្រះវរបិតារបស់ព្រះយេស៊ូគ្រិស្ដដែលជាព្រះអម្ចាស់នៃយើងជានិច្ច 4 ព្រោះយើងបានឮអំពីជំនឿរបស់អ្នករាល់គ្នាលើព្រះគ្រិស្ដយេស៊ូនិងអំពីសេចក្ដីស្រលាញ់ដែលអ្នករាល់គ្នាមានចំពោះពួកបរិសុទ្ធទាំងអស់ 5 គឺជាសេចក្ដីស្រលាញ់មកពីសេចក្ដីសង្ឃឹមដែលបានបម្រុងទុកសម្រាប់អ្នករាល់គ្នានៅស្ថានសួគ៌ជាសេចក្ដីសង្ឃឹមដែលអ្នករាល់គ្នាបានឮរួចមកហើយនៅក្នុងព្រះបន្ទូលនៃសេចក្ដីពិតដែលជាដំណឹងល្អ 6 ដែលបានមកដល់អ្នករាល់គ្នាហើយដំណឹងល្អនេះបង្កើតផលផ្លែនិងចម្រើនឡើងនៅក្នុងពិភពលោកទាំងមូលដូចជានៅក្នុងចំណោមអ្នករាល់គ្នាដែរតាំងពីថ្ងៃដែលអ្នករាល់គ្នាបានឮនិងបានយល់ព្រះគុណរបស់ព្រះជាម្ចាស់ទៅតាមសេចក្ដីពិត 7 ដូចដែលអ្នករាល់គ្នាបានរៀនពីលោកអេប៉ាប្រាសជាបាវបម្រើរួមការងារដ៏ជាទីស្រលាញ់របស់យើងស្រាប់ហើយគាត់ជាអ្នកបម្រើដ៏ស្មោះត្រង់របស់ព្រះគ្រិស្ដសម្រាប់អ្នករាល់គ្នា 8 ហើយគាត់ក៏បានប្រាប់យើងឲ្យដឹងដែរអំពីសេចក្ដីស្រលាញ់របស់អ្នករាល់គ្នានៅក្នុងព្រះវិញ្ញាណ។ 9 ហេតុនេះហើយបានជាចាប់តាំងពីថ្ងៃដែលយើងបានឮអំពីអ្នករាល់គ្នាយើងបានអធិស្ឋានសម្រាប់អ្នករាល់គ្នាឥតឈប់ឈរឡើយទាំងទូលសូមឲ្យអ្នករាល់គ្នាបានពេញដោយការយល់ដឹងអំពីបំណងរបស់ព្រះអង្គតាមរយៈប្រាជ្ញានិងចំណេះដឹងទាំងឡាយខាងវិញ្ញាណ 10 ដើម្បីឲ្យអ្នករាល់គ្នារស់នៅស័ក្ដិសមនឹងព្រះអម្ចាស់ទាំងឲ្យព្រះអង្គសព្វព្រះហឫទ័យនៅក្នុងការទាំងអស់និងដើម្បីឲ្យអ្នករាល់គ្នាបង្កើតផលផ្លែនៅក្នុងគ្រប់ការល្អព្រមទាំងចម្រើនឡើងនៅក្នុងការយល់ដឹងអំពីព្រះជាម្ចាស់ 11 ហើយឲ្យមានកម្លាំងប្រកបដោយអំណាចគ្រប់បែបយ៉ាងស្របតាមព្រះចេស្ដាដ៏រុងរឿងរបស់ព្រះអង្គដើម្បីឲ្យអ្នករាល់គ្នាមានការស៊ូទ្រាំនិងការអត់ធ្មត់គ្រប់បែបយ៉ាង 12 រួចអរព្រះគុណដល់ព្រះវរបិតាដោយអំណរដ្បិតព្រះអង្គបានធ្វើឲ្យអ្នករាល់គ្នាស័ក្ដិសមនឹងមានចំណែកក្នុងមរតករបស់ពួកបរិសុទ្ធដែលនៅក្នុងពន្លឺ។ 13 ព្រះអង្គបានសង្គ្រោះយើងពីសិទ្ធិអំណាចនៃសេចក្ដីងងឹតរួចនាំយើងមកក្នុងនគរនៃព្រះរាជបុត្រាដ៏ជាទីស្រលាញ់របស់ព្រះអង្គ 14 ហើយនៅក្នុងព្រះរាជបុត្រាយើងមានការប្រោសលោះដែលជាការលើកលែងទោសបាប។ 15 ព្រះរាជបុត្រានោះជារូបអង្គរបស់ព្រះជាម្ចាស់ដែលមនុស្សមិនអាចមើលឃើញនិងជាកូនច្បងក្នុងចំណោមអ្វីៗទាំងអស់ដែលព្រះជាម្ចាស់បានបង្កើតមក 16 ដ្បិតអ្វីៗទាំងអស់ដែលនៅស្ថានសួគ៌និងនៅផែនដីបានកើតមកដោយសារព្រះអង្គទាំងអ្វីៗដែលមនុស្សអាចមើលឃើញនិងមិនអាចមើលឃើញមិនថារាជ្យបល្ល័ង្កអំណាចគ្រប់គ្រងការគ្រប់គ្រងឬសិទ្ធិអំណាចគឺអ្វីៗទាំងអស់កើតមកដោយសារព្រះអង្គហើយសម្រាប់ព្រះអង្គ។ 17 មុនមានអ្វីៗទាំងអស់មានព្រះអង្គរួចហើយរីឯអ្វីៗទាំងអស់នៅស្ថិតស្ថេរដោយសារព្រះអង្គ។ 18 ព្រះអង្គជាព្រះសិររបស់រូបកាយដែលជាក្រុមជំនុំហើយព្រះអង្គជាដើមដំបូងជាកូនច្បងដែលបានរស់ពីស្លាប់ឡើងវិញដើម្បីឲ្យព្រះអង្គត្រលប់ជាមេលើអ្វីៗទាំងអស់ 19 ដ្បិតព្រះជាម្ចាស់សព្វព្រះហឫទ័យឲ្យគ្រប់ទាំងសេចក្ដីពោរពេញរបស់ព្រះអង្គស្ថិតនៅក្នុងព្រះរាជបុត្រា 20 ហើយឲ្យអ្វីៗទាំងអស់ផ្សះផ្សានឹងព្រះអង្គតាមរយៈព្រះរាជបុត្រានោះគឺតាមរយៈឈាមរបស់ព្រះរាជបុត្រាដែលបានបង្ហូរនៅលើឈើឆ្កាងព្រះអង្គបានបង្កើតសន្ដិភាពជាមួយអ្វីៗទាំងអស់មិនថានៅស្ថានសួគ៌ឬនៅផែនដីទេ។ 21 ដូច្នេះកាលពីដើមអ្នករាល់គ្នាបានដាច់ចេញពីព្រះជាម្ចាស់ហើយបានតាំងចិត្ដធ្វើជាសត្រូវដោយប្រព្រឹត្ដអំពើអាក្រក់ 22 ប៉ុន្ដែឥឡូវនេះព្រះអង្គបានឲ្យអ្នករាល់គ្នាផ្សះផ្សានឹងព្រះអង្គតាមរយៈការសោយទិវង្គតនៃរូបកាយខាងសាច់ឈាមរបស់ព្រះគ្រិស្ដដើម្បីឲ្យអ្នករាល់គ្នាបានបរិសុទ្ធគ្មានកំហុសហើយឥតបន្ទោសបាននៅចំពោះព្រះជាម្ចាស់ 23 បើអ្នករាល់គ្នាពិតជាស្ថិតនៅក្នុងជំនឿដែលបានចាក់គ្រឹះហើយមាំមួនទាំងមិនងាកចេញពីសេចក្ដីសង្ឃឹមរបស់ដំណឹងល្អដែលអ្នករាល់គ្នាបានឮនោះ។ ដំណឹងល្អនោះត្រូវបានប្រកាសប្រាប់ដល់មនុស្សទាំងអស់ដែលត្រូវបានបង្កើតមកនៅក្រោមមេឃហើយប៉ូលខ្ញុំនេះបានត្រលប់ជាអ្នកបម្រើដំណឹងល្អនោះ។ 24 ឥឡូវនេះខ្ញុំមានអំណរនឹងការរងទុក្ខលំបាករបស់ខ្ញុំដោយព្រោះអ្នករាល់គ្នាដ្បិតខ្ញុំកំពុងបំពេញក្នុងរូបសាច់របស់ខ្ញុំនូវភាពខ្វះខាតនៃការរងទុក្ខលំបាករបស់ព្រះគ្រិស្ដសម្រាប់រូបកាយរបស់ព្រះអង្គដែលជាក្រុមជំនុំ 25 ហើយខ្ញុំក៏ត្រលប់ជាអ្នកបម្រើក្រុមជំនុំស្របតាមតួនាទីមើលការខុសត្រូវដែលព្រះជាម្ចាស់ប្រទានឲ្យខ្ញុំសម្រាប់អ្នករាល់គ្នាដើម្បីឲ្យអ្នករាល់គ្នាស្គាល់ព្រះបន្ទូលរបស់ព្រះអង្គសព្វគ្រប់ 26 គឺជាសេចក្ដីអាថ៌កំបាំងដែលបានលាក់ទុកតាំងពីអស់កល្បតរៀងមកប៉ុន្ដែឥឡូវនេះបានបង្ហាញឲ្យពួកបរិសុទ្ធរបស់ព្រះអង្គស្គាល់ 27 ដោយព្រះជាម្ចាស់សព្វព្រះហឫទ័យបង្ហាញឲ្យពួកគេស្គាល់សិរីរុងរឿងដ៏បរិបូរនៃសេចក្ដីអាថ៌កំបាំងនេះនៅក្នុងចំណោមសាសន៍ដទៃគឺព្រះគ្រិស្ដគង់នៅក្នុងអ្នករាល់គ្នាជាសេចក្ដីសង្ឃឹមសម្រាប់សិរីរុងរឿង។ 28 យើងប្រកាសអំពីព្រះអង្គហើយដាស់តឿននិងបង្រៀនមនុស្សគ្រប់គ្នាដោយប្រាជ្ញាសព្វបែបយ៉ាងដើម្បីនាំមនុស្សគ្រប់គ្នាឲ្យពេញវ័យនៅក្នុងព្រះគ្រិស្ដ 29 ហើយសម្រាប់ការនេះខ្ញុំធ្វើការនឿយហត់ទាំងតយុទ្ធដោយអានុភាពរបស់ព្រះអង្គដែលធ្វើការយ៉ាងមានអំណាចនៅក្នុងខ្ញុំ។